Nuuj in Lin: De Prins Nuuëdigtj Oet

Ein nuuj seizoen, ein nuuj ivvenement in Lin! Zit alvas in ugge agenda: op 25 januari 2020 tovere v'r de Hermeniezaal om toet eine bontje kirmes. 'De Prins Nuuëdigtj Oet' is eine aovendj door Linner luuj veur Linner luuj. 

Naodet v'r aafgeloupe seizoen aafsjied noome van 't Kwekgala, bleef d'r toch get knage. Geine Bontje Aovendj meer in Lin; det ging d'r biej de luuj toch neet in? Geine sjtress, want 'De Prins Nuuëdigtj Oet' is hét Kwekkerte-ivvenement veur leefhöbbers van sketch, muziek en buutte. Ein iezersjterk concep in ein nuuj jeske! Artieste oet 't dörp, buutte van hoog niveau en ein keur aan oorstrelende muzikale intermezzo's: det is wat g'r moog verwachte. V'r verwelkomme inkele aoj bekinde van de veurbieje Kwekgala's, mer d'r wejt oug eine behaaglijke windj van vernuujing door deze aovendj. 

Wilse mitdoon aan deze Bontje Aovendj mit eine groep of höbse ideeje mit betrekking toet sketch, zang of dans? Nöm dan kontak op via secretaris@kwekkerte.nl.

De kaartverkoup veur dit ivvement begint op woonsdig 4 december. Zeker zeen van dien kaarte? Waer vrundj vanne Kwekkerte en ontvang 48 oer veursjprong op dien dörpsgenote. Meer informatie euver 't programma en de kaartverkoup vólg sjnel. Blief oppe heugte via ós Facebookevenement.