Sjteun de vastelaovendj in Lin mit ein Vrunjkaart van CV de Kwekkerte. Veur sjlechs €11 per jaor draag g'r biej aan ein laevendig Lin en profiteert g'r van inkele interessante veurdeile.
CV de Kwekkerte organiseert eeder jaor talloze evenemente om de Vastelaovendj in Lin oppe bein te haoje. Dink aan onger angere 't Prinsebal, de Leedjesaovendj, de Prinsereceptie, 't Kwekgala, A-meezing Lin, de Butegala's en de Groeëte Linner Optoch. Oug dit jaor komme dao weer inkele nuuje aovendje biej. Om dit alles te kinne facilitere, kinne v'r uch (financiële) hulp good gebroeke. Door ein Vrunjkaart aan te sjaffe à €11 per jaor, kinne veer al dees activiteite blieve organisere veur de Linner gemeinsjap.
Alle veurdeile van de Vrunjkaart op ein riej:
- De ervaring haet ós geleerd det de tickets veur de versjillende evenemente es werme breudjes euver de digitale toonbank gaon. A-meezing Lin woor binne 2 daag oetverkoch, de kaertjes veur beide Butegala's woore zelfs binne 24 oer allemaol op. Mit ein vrunjkaart höb g'r 48 oer veursjprong biej de kaartverkoup. Det wil zigge, veurdet de verkoup aopenbaar gemaak wird, höb g'r 2 daag de tied om uch kaarte veilig te sjtèlle. Daomit kin't g'r vriewaal zeker aanwezig zeen biej uch favoriete Kwekkerte-evenemente.
- G'r ontvank ein gratis vastelaovesgezèt ter waarde van €5. Daomit höb g'r de helf van uch investering al terök verdeend.
- G'r sjteunt de Linner Vastelaovendj. Es dank daoveur vermelde v'r uch mit naam en woonplaats in diezelfde vastelaovesgezèt. Vrunj die zich veur 11 december höbbe aangemeldj komme in aanmerking veur dees vermelding.
