JEROEN I VAN MONTFORT
In eine knatsjvolle Harmoniezaal kwoom noa ein sensationele show oeteindelik Jeroen I nao veure es de nuje veurgenger van de Kwekkerte!
Same mit zien adjudante Roy, Tim, nog ins Roy en William zal hae regere mit de sjpreuk:
Van Mofert toet Lin, duke v'r de Vastelaovendj in!
Proclamatie Jeroen I
Ich, Jeroen Jacobus Helena Maria van Mofert, zoon van Catharina Anna Maria Mans oet Tungelder en Jozef Theodorus Maria van Mofert, neet oet Mofert mer oet Postert, gebaore in Bagdad-City (oftewaal Bieëgdje), laot uch weite en verklaor hiejbiej det:
Ten 1ste:
Det ich natuurlik miene veurgenger Kenneth I same mit zien adjudanten en aanhang van herte wil bedanke veur ’t geweldig sjieke sezoen det v’r gehadj höbbe. Waat höbbe v’r gefieësj! Dich höbs in idder geval good veurgedaon wie ‘t mot. Danke veur ’t sjooëne sezoen!
Ten 2dje:
Det ich ontzettendj bliej bön det miene druim om Prins te waere in vervulling geit. En det precies 11 jaor naodet ich in dit sjooëne dörpke bön komme wone. Ich wil uch den ouch allemaol van herte oetneudige om deze druim same te belaeve! Laote v’r same druime! Druime mit de aug ope!
Ten 3dje:
Det ich, wie ich nog in groep 7 zoot, de letste Joker mocht zeen van de Jokers in Bieëgdje. Dae Joker had de taak om euveral veur de groeëte Prins in de polonaise de kefees nao binne te gaon.. Noe, 30 jaor later, zal ich wederom veurop laupe mer dan waal mit vaere oppe kop in plaats van belkes.
Ten 4dje:
Det de Kwekkertepool dit jaor nao de vistrappe verplaatsj waerdj. Mit de sjtraumversjnelling dao kinne v’r nog sjneller ein fieëske boewe. En natuurlik ouch heerlik om de daag drnao, de kater weg te laote drieve, door d’r effe in te duke. Ich neudig uch allemaol van herte oet!
Ten 5dje:
Det ich dit jaor mit pien in mien hert, biej El Cãpel helaas neet op mien trompet zal träöte.. Mer ich weit zeker, det El Cãpel d’r weer veur zörgtj det idderein mit schwungt op heure meziek. Same make v’r d’r ein fieës vanne! Of ‘t noe oppe sjtraot of inne kefees is! Stilstaon is gein optie!
Ten 6dje:
Same mit Ruudje van ozze tempel ‘Kefee Den Tegel’, gaon v’r gaas gaeve.. Om 11u ’s mörges, duuke v’r den Tegel in en aan ’t eind vanne daag sloete v’r aaf mit nog eine pils (hangendj) aan de bar. Of missjien nog eine…
Ten 7dje:
Det Kefee ’t Benkske veur ’t ieërst eine prins én adjudant haet! Personeelstechnisch natuurlik erg lestig in dizze tieje.. mer laote v’r geweun noe aafspraeke det g’r geweun allemaol mit gaont, wo v’r haen gaon.. den is det ouch opgelosj.
Ten 8dje:
Ich haop det idderein ziene gsm get minder zuutj mit dees daag en mieër de luuj om zich haen! Same make v’r de Vastelaovendj en det doon v’r geweun live zonger sjermke, mer vanoet os hert! En bön mer neet bang, d’r waere genog foto’s door de fotograaf gemaaktj. En jao, van sommige zalse wellich sjpiet höbbe.
Ten 9dje:
Same mit mien adjudanten, de Kwekkerte, de Kwaakers, de Kuulköp en de Sjtoepkloekers gaon v’r os bis doon om d’r ein geweldig sjooën sezoen van te make in Lin en omsjtreke! ’t sezoen is gelökkig langk, dus kinne v’r volop viere! En v’r haope natuurlik det idderein mit os mit de Vastelaovendj in duuktj! En veural ouch de jeugd, want die haet de toekoms!
Ten 10dje:
Det ich ’t neet erg vinj det luuj op winjtersjport gaon. Det doon ich zelf namelik ouch altied en wel nao Fins Laplandj. Mer den waal pas nao aswoonsdig vertrikke gaer!
Ten 11dje:
Ich haop det v’r mit ’t ganse dörp same de Vastelaovendj kinne viere. Laote v’r efkes same aafsjakele van de hektiek en stress om os haen en geweun geneete van ’t laeve mit z’n alle. En det v’r den aswoonsdig wellich sjtiekem mooge dinke: pfff… waat bin ich bliej det ich dae of die noe weer effe neet hoof te zeen de kommendje tied.
Dit alles gaon v’r doon onger miene sjpreuk:
“VAN MOFERT TOET LIN, DUKE V’R DE VASTELAOVENDJ IN!”
