Vier de vastelaovendj in Lin: dit is d'r te doon in 't dörp
D'r geit eine wèrreld veur ós aope! De lètste coronamaotregele zólle vlak veur de vastelaovendj vervalle, woodoor 't - wellich gehieël taege de verwachtinge in - toch meugelik is om eine 'aojerwèts' te viere. Biej deze ein euverzicht van alle aktiviteite die toet en mit aswoonsdig in Lin georganiseerd zólle waere en woo CV de Kwekkerte, vanzelfsjpraekendj, acte de presence zól gaeve.
Let op: dit pregram is op zeer korte termien toet sjtandj gekomme en door versjillende partieje samegesjtèld. 't Kint daorom veurkomme det d'r nog ein en anger verangert. V'r probere dit euverzicht zo compleet meugelik te haoje, mer haoj de Facebookpagina's van de kasteleins en de CV inne gate veur de meist recente berichgaeving.
Maondig 21 fibberwari
Aod Wieverbal (20:00)
Klink 'ns mit diene buurman, auch al höbse gein idee waem d'r naeve dich sjteit! Inne alle drie de dörpskeffees kint g'r oppe maondig veur de vastelaovendj terech veur ein pötje beer en de broeëdnuuëdige dosis carnavaleske gezelligheid.
Zalencentrum de Harmonie: DJ Guido vanaaf 18.11
Café den Tegel: DJ Langk XL & Big Benny vanaf 20.11
Café de Tramhalte: nog neet bekind
Let d'r op det g'r veur dit ivvenement esnog ein geldige QR code mot höbbe!
Vriedig 25 fibberwari
Oetroope Tramkeuning of -Kwien (20:00)
Waem wuuërdj de opvólger van Keuning Boy I? Waem wuuërdj inne mantel van Sjpaarkas Alles in de Gleuf gehese? Vanaaf 20 oer geit 't sjouwsjpel zich voltrèkke biej
Café de Tramhalte in Lin, dus bön dao, of bön veerkantj!
Pyjamabal (20:11)
Vaeg dich die pupse mer ‘ns oet de auge, want biej
de Harmonie kinse terech veur ‘t enige echte Pyjamabal! DJ SDNX zörg veur de muzikale noot en ós lieftallige kasteleins Paul en Vief zörge veur de res.
Zaoterdig 26 fibberwari
Oetroope Sjtoepkloekersprins (20:11)
Auch ós kammeräöj vanne Sjtoepbillies waage zich oppe valreep aan eine nuuje veurgenger! Prins Bas I zól op dizzen aovendj eine waardige opvolger kriege. Waem geit deze biezunjere vastelaovendj toet ein ongekind hoeëgtepuntj bringe? Vanaaf 17 oer is bal biej
Café den Tegel!
Zondig 27 fibberwari
Onthulling herdenkingmonument Ger Reijners (14:11)
Ein van ós grote dörpshelde is ós aafgeloupe jaor ontvalle en verdeentj natuurlijk ein passend gedinkteike in ‘zien’ dörpke. Vanaaf 14.11 wuuërdj oppe
Kiosk in Lin ein herdenkingsmonument onthuld es eerbetoeën aan Ger Reijners.
De Groeëte Kleine Linner Kroegetoch (aansjloetend)
Det d'n optoch al twee jaor neet haet kinne trèkke geit ós neet inne kaoj kleijer zitte. Daorom trikke v'r op zondig middels eine mini-optoch langs alle keffees in ós sjoeëne maasdörp. Om 14.11 wuuërdj d'r gejstart biej de kersverse
Ger Reijners Kiosk, om vervolgens via
Café de Tramhalte en
Zalencentrum de Harmonie toet sjlot
Cáfe den Tegel aan te doon.
Klûntocht
De Linner kasteleins en aetgelegenhede höbbe zich op vastelaoveszondig samegepak. In ein waore klûntoch trèkse van café nao café, én langs inkele culinaire highlights van 't dörp. De kins ein sjtempelkaart haole biej de drie dörpskeffees en vervolgens aangaon biej ongersjtaonde locaties om ein lekkere versjnapering op te haole. Trèks doe 't nog? Trèk de toch! Meer info via de
feesboekpagina van de Harmonie.
- Cafetaria Bie Viev
- Pizzaria Milano Linne
- Eetcafé Linne
- Cafe den tegel
- Cafe de Tramhalte
- De Harmonie Linne
Sjtoepkloekersreceptie (17:11)
De kersverse Prins van de Sjtoepkloekers moog eine aovendj nao zien oetroope drèk nog 'ns aane bak, want den sjtuit alweer zien receptie oppe rol. Biej
Café Den Tegel is 't wederom vastelaovendj waat de klok sjleit oppe zondig.
Maondig 28 fibberwari
Kwatsjmiddig (15:00)
Oppe maondigmiddig make v'r wederom ein rundje langs de Linner kroege. V'r beginne om 14.11 oer biej
de Harmoniezaal, vervolge de route om 15.30 oer nao
Café de Tramhalte en besjloete om 16.45 oer biej óze tempel
Café Den Tegel. Ongerwaeges zólle versjillende vastelaovesvierders en -groepe ein ludieke act opveure, of geweunwaeg ein vastelaovesleedje bringe op 't aope podium. Auch eur inbring is daobiej van hèrte welkom!
Mertparade (17:11)
's Aoves verplaatsj 't feesgedruus zich wederom nao
Den Tegel veur de jubileumedisie vanne Mertparade. Veur de 11dje keer vinjt dit sjpektakel plaats, woobiej versjillende gerenomeerde binne- en boetedörpse artieste zich oppe bühne zólle melje.
Dinsdig 1 mieërt
Poetebal (14:11)
De Linner poete kinne häör hertjes weer ophaole oppe bühne inne kleine zaal vanne
Harmo. 't Poetebal belaef op vastelaovesdinsdig häör 32.5e edisie vanaaf 14.11 oer!
Vastelaoveszangles Maartenshof (besjlaote)
Neet allein de jongste telge kómme vandaag aan häör trèkke, auch de aojer garde kint vandaag preuve aan de vastelaovendj. Ein aantal muzikale leeje vanne CV bringk ein bezeukske aan
Zorghoes de Maartenshof. Zie zörge dao veur de muzikale noot en ein ongetwiefeld gezellig samezeen.
Kwekkert Verbranje (19:11)
Om 19 oer geit aojerwets de hens d'r in! Wellich get minder emotioneel belaaje es normaal (of missjien juus nóg mieër), mer daorom neet minder gezellig. Oppe
Nuuj Mert verbranje v'r de Kwekkerte om symbolisch dit biezunjere seizoen aaf te sjloete.
Receptie Tramkeuning of -kwien (19:33)
Nao de symbolische sjloeting van 't seizoen tikke auch de lètste oere weg veur de Tramkeuning of -kwien. Maak nog gauw van dees gelaegenheid gebroek om hem of häör te fillesitere biej
Café de Tramhalte, én natuurlik om nog te geneete van deze lètste vastelaovesaovendj!
Woonsdig 2 mieërt
Hieëring sjille (20:00)
‘t Allerlètste rundje! Om ffkes te acclimatisere make v’r toet besjloet nog ein ronde langs
alle dörpskroege. Deze keer vergezeld door eine zoute hieëring en wellich mit eine cola ;-)
Kortom, genóg te belaeve in Lin mit de Vastelaovendj! Veer haope uch weer in 't dörp te moge treffe en winse uch natuurlik väöl plezeer op dees döl daag. Det de zon moog sjiene nao eine'n duustere tied!
Vergaet neet te laeve, vergaet neet te lache,
En maak dat vanaovend, den daag wurd geplök.
Vergaet neet te laeve, Vergaet neet te lache,
‘n nach vastelaovend, ‘n laeve gelök.
Vastelaovendj same!
