Terökkieke: dit waas de vastelaovendj van 2020-2021
De digitale optoch haet door de sjtraote getrokke, de sjlok op 't Poetebal kwoom dit jaor door de breevebus en zelfs de Kwekkert is in 't maffe coronajaor de fik in gegange. De Vastelaovendj haet ondanks de pienlike coronamaotregele kleur gebrach in ós dörpke en dao zeen v'r gruuëts op. Biej deze nog 'ns alle hoeëgtepuntje verzameldj...
Vastelaovendj in Coronatieje: Det Kan In Lin Allein
In de ieërste waeke van 't nuje jaor brachte v'r hoes aan hoes ein gratis Vastelaovendj gezèt rondj es aaftrap van 't coronaseizoen. Gein 128 pagina's full color, mer ein bescheide magazine mit daoin de hertelikke vastelaoveswinse van eederein dae de vastelaovendj leefhaet. Om 't ein en anger get mieër sfeervol te verpakke höbbe v'r drèk de sjtraote van Lin versierd mit Roeëd, Gael, Greune ballonne!
Lin FM: ein vrolik tweeluik
Op 16 en 30 jannewari waerdje de ether besjtierd door de men van Lin FM. Tiedens de Leedjesaovendj Bingo sjting de Linner vastelaovesmuziek centraal en biej de Vastelaovesquiz waerdje de deilnömmers danig aane tandj geveuldj euver häör vastelaoveskinnes. Mer leefs 187 bingokaarte waerdje gedownlaod en mer leefs 52 teams sjtrede mit veur de euverwinning. Veer sjpraeke van ein gesjlaag tweeluik!
't Aodwieverbal: Auch Digitaal ein Verrassing
Det auch in 2021 de tradisies neet verlaore gaon bliek onger angere oet 't digitale Aod Wieverbal. Ein aantal gekke noome zich de meujte om zich gemaskerdj en al veur de camera te zitte. Nao 2,5 oer vol sjpelkes, sjunnige kal inne chat van de zoom-meeting en ein lekker glaeske beer, koste de dampende maskers aaf. Zelfs van boete Lin bleeke de deilnömmers te zeen toegesjtruimd. Alles om deil oet te make van dees unieke gebeurtenis!
Ein carnavaleske route door 't Linnerlandj
Bewaege is gezondj, zeker noe v'r väöl (te väöl) binne motte zitte. Daorom höbbe v'r ein Vastelaovessjpeurtoch oetgezat die dwars door 't hert van ós sjoeëne maasdörpke löp. De toch is gevuldj mit leuke, carnavaleske vraoge en opdrachte en is gesjik veur jongk en aod. De toch is nog toet en mit 21 fibberwari te loupe. Kiek veur mich informatie op www.kwekkerte.nl/sjpeurtoch!
TóCh eine optoch veur Prins tim I!
Wieväöl pech kinse höbbe?! De ieërste keer gooide eine veurjaorssjtorm roet in 't aete, de twieëdje kieër mosj d'r vanwaege corona eine sjtreep door de Groeëte Linner Optoch van Prins Tim I. Ondanks det 't nuje jaor helaas wederom weinig fedusie brach, is d'r dizze vastelaovendj tóch eine optoch door de sjtraote getroch, zij 't digitaal. Zelfs De Limburger kreeg d'r loch vanne, en terech, want mit mèr leefs 30 sjtartnummers is 't eine sjtoet om gruuëts op te zeen.
Coronacreativiteit kint gein grenze op 't 32e poetebal
"De jeug haet de toekoms", det is de boodsjap die menig Vórs van CV de Kwekkerte euver de bühne haet probere te bringe. Daorom is 't juus in dees tieje belangriek om 't vastelaovesgeveul auch op ós jongske telge euver te bringe. Kint de Vastelaovendj neet nao de kinjer kómme? Den kump de Vastelaovendj nao de kinjer toe! In ein zinderende liveoetzending zoog gans Lin in ein kleine 4 oer ein varieté program besjtaonde oet dans, zang, live meziek, live biejdrages van óze Prins Tim I ein eine houp sjaele wazel van de deensdoondje prizzentatore.
De Linner Hemel kluuërtj Oranje
Corona of gein corona: op vastelaovesdinsdig 19:33 geit de Kwekkert de hens inne! 't Waas ein sjoeën einde van ein biezonjer seizoen. Ondanks det v'r - zo wie det ingele sjtömke van Norbert Thijssen zo sjoeën kint bezinge - neet mit de prins zie aan zie koste sjtaon haet 't biej ós toch ein geveulige sjnaor weite te rake.
Bedank veur ein onvergaetelik seizoen!
Laot ós veuropsjtèlle det veer haope noeëits meer ein seizoen mit te hoove make wie dit. Toch höbbe veer, ondanks alles, genaote van de kleine leechpuntjes die dees gries en donker daag kluuër höbbe gegaeve. Veer bedanke, oet de grondj van ós hert,
Prins Tim I en zien gevolg, die nog ein seizoen ein sjtraolendj gezich höbbe gegaeve aan de Vastelaovendj in Lin.
Ós sjponsore, die ós ondanks dizze zjwaore tied zeen blieve biejsjtaon.
De werkgroep Vastelaovendj 2021, die zich neet haet laote kinne en altied in meugelikhede haet gedach om baovesjtaonde veur uch meugelik te make.
Alle deilnömmers aan de bingo, de quiz, de sjpeurtoch, de optoch en 't poetebal. Veer goove de veurzèt, geer höb 't grandioos ingeköp!
Alle kiekers, reageerders en likers op ós digitale ivvenemente. Veur uch höbbe v'r 't gedaon en hertverwèrmendj vonje v'r uch positieve reacties.
