NUUTS

't Prinsebal geit door!

Leef Linner Luuj,

Op dit moment gebeurtj d’r väöl rondjom de vastelaovendj in Limburg. D’r waere ane eine kantj evenemente aafgelas en op anger plaatse gaeft men aan door te wille gaon. De aafgeloupe daag haet der intensief euverligk plaatsgevonje tösse de gemeindje en angere belanghöbbendje.

Vandaag höbbe veer besjlaote om, op basis vanne huidige wèt- en regelgaeving, òs activiteite door te laote gaon.

Vanoet de börgemeister is ein moreel appèl gedaon op òs es vereniginge om waakzaam om te gaon mit activiteite of om dees zelfs neet door te laote gaon. Juus dees moreel kwestie sjteltj òs veur ein dilemma; ane eine kantj wille v’r alles gaer door laote gaon, ane angere kantj zeen v’r de berichte in ’t nuujts die òs doon aafvraoge of v’r hie waal good aan doon!?

Oeteindelijk is in samesjpraok tösse CV de Kwekkerte, JCV de Kuulköp en De Harmonie Linne besjlaote om toch eine nuuje prins en jeugdprinsepaar oet te gaon rope op zaoterdig 13 november. En det doon v’r mit de volgendje achterligkendje gedachte:

Vanoet moreel auchpunjt is ’t, òs inzeens, belangriek om òs vastelaoeves activitieten te laote doorgaon. Nao de 1e  periode van corona is ‘t maatsjappelijke belang zeer groeat. Zeker veur un kleine dörpkern es Lin. Ein 2e jaor op riej gein activiteite orgnanisere zów ‘t draagvlak veur vastelaovendj kinne ongermeine. Daobiej zeen v’r al moandje bezig mit alle veubereidinge veur ‘t aansjtaonde vaselaoves sezoen. En zeen de geldende corona-maotregele die genomme motte waere toet in detail oetgewèrktj.

Vanzèlfssjpreakendj haoje v’r òs aan dees noe geldende wèt- en regelgaeving en zólle òs hiej ten alle tieje aan conformere. Ein geldige QR-code i.c.m. uch identiteitsbewies is verplich. Doaneave geldtj veur ‘t Prinsenbal ein maximaal aantal bezeukers van 50% van de maximale zaal capaciteit (i.p.v. de geldende 75%). V’r doon hiejbiej ouch ein dringendj beroep op uch: biej klachte blief toes en laot uch teste!

Moch a.s. vriedig 12 november door ’t demissionair kabinet waere ingegrepe, zólle veer òs hiejbiej neerligke en òs activiteit aaflasse.

Names,
CV de Kwekkerte
JVC de Kuulköp
De Harmonie - Linne