NUUTS

Opgaeve deilnummers Poetebal 2021

Oproop aan alle poete van Lin.
’t Linner Poetebal is op zeuk nao dich !!

Leef Linner Poete,
Coronatied is ’n vervaelendje tied! Dao zeen v’r mit zien alle inmiddels waal achter gekomme mèr laot ós same probere ouch in dizze sombere tied get sjieks te doon!

’t Poetebal haet waal ’n leuk idee wobie veer uch neudig höbbe…….

Wils doe toch mit carnaval sjtraole en idderein laote zeen detse zangtalent en/of fantastische dansmoves höbs den bösse bie os aan ‘t goje adres! Geheel in “Coronasjtiel” organisere veer op vastelaovesdinsdig 16 februari as. ’t online Linner Poetebal mit es thema:

Masked Singer/Dancer show!

De bedoeling is dets doe allein of mit vriendjes of vriendinnetjes thoes ’n gemaskerdj optraeje verzörgs en det det sjpètterendje optraeje door pap, mam of emes anges wórt opgenomme. Det optraeje kintj ’n leedje, ’n dènske, ’n buut of waat den ouch zeen….det moogs doe helemaol zèlf bepaole! Oeteraardj bisse gemaskerdj en neet herkinbaar veur de res.
’t is immers de Masked Singer/Dancer Show!

Dae opname kintj vervolgens digitaal waere opgestuurdj bie voorkeur via WeTransfer.com (mailen nao
poetebal.linne@gmail.com) of per
Whatsapp (06-83540553) of op USB bij Beatrixstraat 7. Uterste termijn van op- of toesjture vanne opname: maondig 8 februari.

Veer zolle den op dinsdig 16 februari via ’n Live “digitale ZOOM/Facebook verbinjing” alle inzendinge veurbie laote komme en ’n echte jury “live“ laote besjlisse waem de beste, gekste en of sjiekste Masked singer/dancer 2021 geit waere.

KwekkertePrins Tim en adjudante, Kuulköp jeugdprinsepaar Mitchel & Senna en uiteraard ouch KloekersPrins Bas zolle op ein verrassendje mèneer ouch “aanwezig” zeen en gaon heur uterste bés doon om alle deilnummers den in ’t zunke te zette.
Kortom, ’t wórt ’n ongeluifelik sjoeane en memorabele Poetebal editie wobie doe es artiest Linner vastelaovendj gesjiedenis kins sjrieve. Aarzel dus neet en gaef dich mit goodkeuring van pap en mam vandaag nog op!!

Download hiej 't opgaveformulier

‘t Poetebal 2021 kumptj nao dich toe dizze vastelaovendj!