Geine nuje veurgenger in 2022 en diverse activiteite aafgelasj

Leef luuj,

Zowie g'r ongetwiefeldj wèt, woor 't prinsoetrope aanvankelik gepland op zaoterdig 13 november j.l. De aovendj van te veure krege v'r te make mit sjtrengere coronamaotregele, die 't oetrope onmeugelijk maaktje. V’r höbbe destieds gezoch nao ein alternatieve datum, dae v'r gevonje dachte te höbbe in vriedig 7 jannewari aansjtaonde.
 
V'r höbbe lang de haop gekoesterd det v'r ós pregram vanaaf jannewari weer koste oppakke. Helaas is dizze haop al sjnel ingehaold door de realiteit. N.a.v. de persconferentie van dinsdig 14 december jl. höbbe v'r motte concludere det ‘t gein haolbare kaart is om ós activiteite van begin jannewari doorgang te laove vinje. In ongerling euverlègk mit JCV de Kuulköp höbbe v'r mit pien in 't hèrt 't volgendje motte besjloete:

1️⃣ Veur 't sezoen 2022 zólle v'r gin nuuj veurgengers oetrope. V'r höbbe nao ós inszeens gedach in oplossinge en gekeke nao alternatieve opties, maar v'r zeen helaas gin ruumte om dit op ein anger meneer in te vulle die rech duit aan dizze traditie. 

2️⃣ Daonaeve höbbe veer ten gevolge van de maatregele auch besjlaote om de volgendje activiteite oet ós reguliere pregram aaf te gelasse: 
- ‘t Prinsebal (vriedig 7 jannewari)
- De Leedjesaovendj (zondig 16 jannewarI). Deilnömmers zeen inmiddels perseunlik oppe huuëgtje gebrach.
- A-Meezing Lin (zaoterdig 22 jannewari)
- De Prinsereceptie (zondig 6 fibberwari)
Auch JCV de Kuulköp höbbe de prinsereceptie (20 fibberwari) aafgelas

3️⃣ Veer achte de kans aannömmelik det auch De Prins Nuuëdigtj Oet (zaoterdig 29 jannewari) en Lekker Gek (zaoterdig 12 fibberwari) aafgelasj gaon waere, mer daobiej wachte v’r nog op ein officieel besjloet vanoet de euverheid.  

4️⃣ V'r zölle d'r alles aan doon óm 't programma rondjom det vastelaovesdaag zelf, al dan neet in aangepaste vorm, door te laote gaon. Wanneer v'r hiej meer informatie euver höbbe, zólle v'r dit mit uch deile. Haoj hieveur ózze website en ózze sociale kanale inne gate.

𝗩𝗮𝘀𝘁𝗲𝗹𝗮𝗼𝘃𝗲𝘀𝗴𝗲𝘇𝗲𝘁 𝟮𝟬𝟮𝟮 𝘄𝗮𝗲𝗿𝗱𝗷 𝗼𝗲𝘁𝗴𝗲𝗯𝗿𝗮𝗰𝗵!
Ondanks 't vervaelende berich, zeen v'r verheug waal te moge meldje det d'r dit seizoen waaldegelik ein Vastelaovesgezet inne gebroekelike vorm zól waere oetgebrach. De Kwekkert is vanaaf zaoterdig 5 fibberwari verkriegbaar. Meer informatie volgtj nog!

Daonaeve zölle v'r halverwaege jannewari kleur aan òs sjoeane dörp gaon gaeve. Wie det oet geit zeen, haoje v'r nog aeve geheim. Stay tuned!

Leef luuj, let op elkaar en blief gezondj! V'r winse uch via dizze waeg - ondanks alle coronasirk - ein fijn jaorwisseling en ein fantastisch Nuujjaor! 🎆🥂