Michel I ophelders
Nao ein zinderende editie van "Lin's next KwekkertePrins" woor d'r mer eine kandidaat dae de jury kos euvertuuge om de nuuje veurgènger vanne Kwekkerte te waere: Michel Ophelders. V'r zeen d'r gruuëts op det Michel dit sèzoen veurop wiltj gaon. Same mit zien adjudante Hans Janssen, Frank Douven, Richard Smeets en Leon Munsterman is hae klaor om de bühne in Lin te besjtiere mit ziene sjpreuk:
"Ta-Taah! Ouch det is vastelaovendj!".
Proclamatie Michel I
Ich, prins Michel d'n 1
ste, gebaore in 't Berggeiteriek en getaoge in 't Kwekkerteriek, min of meer actief lid van volleyclub Numidia VC LIMAC en sjtichting de sjtieve sjtang, zaalhoajer van El Cãpel, man van Astrid en vader van Floor, Julia, Sophie en Cas, woonachtig in 't legendarische Kefee van Col, laot uch weite en maak bekindj:
Ten 1ste: Det ich, miene veurgenger prins Tim I Suntjens, wil bedanke veur neet ein, neet twee, mer drie onvergaetelikke jaore. Door de meneer wie hae same mit zien ieskescrew veurop is gegange, de ker haet getrokke en 't fieës haet gemaak, heat hae d'r inderdaad veur gezördj, det mit die daag nemes boetesjpel haet gesjtaon. Tim en zien gevolg, bedanktj! Hulde!
Ten 2dje: Det 't nao veer prinse mit zebra roots, noe tied weartj veur ein angere bloedgroep, en waal 't sjtieve sjtang blood. Ich zal belaove det d'r mit de vastelaovendj gein dopingcontroles gehaoje zölle weare!
Ten 3dje: Det ich d’r enorm gruuëtsj op bön om dizze vastelaovendj vanoet Kefee van Col, de vreugere sjtamzaal van El Cãpel, en de Tram, de tempel en vervangendj stamzaal van El Cãpel, te regere euver 't Kwekkerteriek.
Ten 4dje: Det ich verwach det vanaaf dizze vastelaovendj 't muzikale geweldj geit losbarste in 't Kwekkerteriek. Ig kiek d'r nao oet om mit El Cãpel nao ruum 3 jaor oefene de vastelaovendj weer fatsoenlik op te loestere. Os motto blief: "V'r gaon door toetdet v'r beer kriege!"
Ten 5dje: Det mien adjudante, ondanks det zie d'r super sjiek op sjtaon, ein good fieësje kinne viere. Det oeterlikke sjien bedreegtj, is dink ich waal van toepassing hiej.
Ten 6dje: Det ich haop det mien zin om van de vastelaovendj ein geweldig fieës te make, snel euver sjleit op gans Lin. Zoeëdet v'r same mit de jubilerendje Kwaakers, de Kuulköp, de Kloekers, El Cãpel en alle luuj van Lin op aswoonsdig 'ne fantastische vastelaovendj höbbe gehadj.
Ten 7dje: Det v'r in 't jubileumjaor van de Kwaakers ouch te make kriege mit un doorsjtruim van bepaalde iemanden nao de Kwekkerte. Veur de 1x11 jubillarisse van de Kwaakers: hulde! Ich verwach det de ganse groep noe same mit os gaas geit gaeve. Det is namelijk wiej ’t sjpel gesjpeeldj mót waere!
Ten 8ste: Det v'r ein serieus langk sezoen gaon höbbe en doarom ontzettendj väöl tied en ein geweldig en vol pregram om weer ins normaal en good, vastelaovendj te viere. Det ig hoap det Corona os dit sezoen good gezindj is en det 't meugelik blief om d’r same ein onvergeateliksezoen van te maake. V'r gaon aan'm toet Aswoonsdig!
Ten 9dje: Det v'r mit de adjudante, vrouwluuj en 13 naozaate unne sjieke en serieus grote groep höbbe gevormdj. Van dees jeugd zal de Linner vastelaovendj nog lang plezeer gaon höbbe!!
Ten 10dje: Det ig mich vereerdj veul, det ich ruum ein jaor geleeje al gevraog bön om Prins te waere. Ich verwach det ich doamit get records gebraoke höb. V'r höbbe os den ouch al good veur kinne bereiden en 't aafgelaupe jaor duchtig geoefendj!
Ten 11dje: Det v'r miene sjpreuk dit sezoen mit mien adjudante, El Cãpel, de Raod en de Kwaakers, muzikaal gaon oploestere mit ein Kazoo.
En det alles onger miene sjpreuk:
“Ta-taah! Ouch det is Vastelaovendj !“
