Prins 2019-2020

Tim I Suntjens

Nao ein zinderende editie van Prinse & Prinsessejach sjprong Tim oet 't goude köfferke es nuuje veurgènger vanne Kwekkerte. V'r zeen d'r gruuëts op det Tim dit sèzoen veurop wiltj gaon. Same mit zien adjudante Mike Aarts, Dion Slijpen, Bas Suntjens en Thierry Cloudt is hae klaor om de bühne in Lin te besjtiere mit ziene sjpreuk: "Mit dees daag sjtuit neemes boetesjpel!".   

Prins Tim I Suntjens

Proclamatie Tim I


Ich, prins Tim 1, zoon van Linnerjong Marcel en Maerums maedje Gerrion, laot uch weite, det:

Ten 1e, Hae waas natuurlik neet te misse. Ich höb mit väöl bewonjering gekeke nao miene veurganger prins Norbert I en zien gevolg. Hae sjtaok d’r mit kop en sjouwers baove-oet en haet laote zeen det d’r nog sjteeds genog meziek inne Linner vastelaovendj zit. Woveur groeate dank!

Ten 2e, det ich es keeper van Lin 1, ‘n verlenging vanne wintersjtop inplan om de ker optimaal te kinne trikke en det ich d’r al ’t vertroewe in höb det mien aafwezigheid op ’t veldj good opgevange waerdj. Noe nog haope det ’t mich nao de vastelaovendj nog löktj om dees plek weer trögk te verovere.

Ten 3e, det ich daomit de veerde prins op riej bön dae verbonje is ane voetbalcub en de tweede op riej dae de goal verdedigt. Daomit kinne v’r beweze achte det ‘ne Zebra good same geit mit ‘ne Kwekkert.

Ten 4e, det ich es Kwaaker van ’t eerste oer op 11-11-11 lid bön gewaore van dees sjoean vereniging en dao gin enkel moment sjpiet van höb gehad.

Ten 5e, det ich haop det alle fantastische initiatieve die genaome waere door ’t sezoen haer nog lang zulle blieve veurtbesjtaon. Daomit ‘n groeate dank veur alle miense die zich daoveur inzitte en wille blieve inzitte.

Ten 6e, det ich dit sezoen weggeweidje Linnerjonges (adje Mike, adje Bas en adje Dion) van heinde en verre weer trögk haol nao os sjoeane dörpke Lin en häör blief herinnere aan wo zie vanaaf komme.

Ten 7e, det ich gans Lin ein jaor laot biekomme van oze vors Thierry door hem de functie es adje aan te beje. Bie deze wins ich ziene vervanger Bart taegeliekertied succes om dit kopsjtök te vervange. Mer ich verwach neet anges den det dit gans good mót komme en det v’r gaas gaon gaeve. Want det haet noe einmaol get meer cachet, det is wiej ’t sjpel gesjpeeld mót waere. Ich höb Bingo.

Ten 8e, det v’r same mit de Kwaakers, de Kuulköp, de Kloekers en alle luuj van Lin d’r veur gaon zörge det veer d‘r ‘n fantastisch sezoen van gaon make. Nemes in Lin heurt boetesjpel te sjtaon.

Ten 9de,  det v’r elke minuut vanne klok optimaal benutte en genete van waat de vastelaovendj os bringtj en det v’r os rood-gael-greun hertje laote sjpraeke.

Ten 10e, det ich ’t sjoean vinj óm jongk en aod te verbinje en det ich mich det dit sezoen ouch es doel sjtel. Vastelaovendj laeft en zal blieve laeve, en dit begintj bie de jeugd.

Ten 11e, det veer d’r ‘n knalsezoen van make en det ich elke kans pak dae ich pakke kin. Det ich alles gaef waat ich in mich höb en neet minder. En det doon ich same mit uch, want dae vastelaovendj is van én veur idderein. En det alles onger miene sjpreuk:

“Mit dees daag sjtuit nemes boetesjpel”