Prins 2019

Prins Norbert I Thijssen nuje heerser euver ’t Kwekkerteriek!

Zaoterdig 17 november is Prins Norbert I Thijssen oetgerope toet nuje heerser euver ’t Kwekkerteriek en de 68e prins vanne Kwekkerte.

Prins Norbert I zal dit jaor ongersjteund waere door zien 3 adjudanten Leo Niessen, Ray Theunissen en zienej zjwaoger Rob Smeets.

Prins Norbert I zal regere onger ziene sjpreuk: VASTELAOVENDJ, DÁO ZITJ MEZIÉK IN!

Prins Norbert I is getrouwd mit zien vrouw Sylvia en vader van zoon Vincent en dochter Audrey en zeen woonachtig oppe Greunsjtraot. Norbert wirkt oppe gemeindje Mestreech es `Beleidsmedewerker Wonen´.  In ziene vrieje tied haojt d´r van fotografie, is altied druk bezig mit muziek compenere en sjrieve en is boete lid vanne Kwekkerte ouch lid vanne Sjutterie en is keeper vanne Linner Veteranen.

 

 Proclamatie Prins Norbert I

Ich, Prins Norbert d’n Iste, zoon van Henk Thijssen, van Bekker Cees Thijssen oet Nijmegen en Hendrina Goossens van Baek-Ubbergen, en Dien Thijssen-Houkes van Theo Houkes d’n opper van de gemèndje Nijmegen en Cis Derksen van Wijchen. Tamboer en lid van sjötterie en drumband Sint Martinus Lin,  lid vanne Kwekkerte, keeper vanne Linner veterane en hoeagstwaarsjienlik aod-lid van a.L.a.a.f, vastelaovesvierder van nul toet twieë maeter, laot uch wete en maak bekindj:

Ten 1ste: Det ich miene veurgenger Prins Bart II Slabbers wil bedanke. Hae haet ’t, same mit zien bónte gevolg, de Kwaakers, vurrig seizoen behuuërlik laote krake en Lin daodoor ein fan-tas-tisch vastelaovesseizoen bezörgdj.

Ten 2dje: det ich ozze nuje veurzitter Rob Hooft hieël succes wins veur dit seizoen en d’r op vertroew det hae on-ge-luif-likke wiëze besjloete geit numme.

Ten 3dje: det d’r sinds 4 jaor weer ’n Prins kumtj vanne sjötterie, zoeadet v’r ós ouch in ’t winterseizoen zeker neet gaon vervaele.

Ten 4dje: det d’r väöl vastelaoveservaring óm mich haer sjtuit: Adju Rob, breurke van Aod Jeugprinses Yolanda Smeets. Adju Ray, prins in 2012, Adju Leo, Prins in 2015 en Jeugprins in 1985 in Bieëgdje.

Ten 5dje: det ich vv De Sjtoepkloekers ein fantastisch 2x11 jubileum seizoen toewins en det v’r det mit z’n alle same mit häör gaon viere.

Ten 6dje: det vastelaovendj same wurdtj gevierdj.  Inne zaal, in ‘t café of op ’t plein door aod en jónk, groeat en klein, zoeadet degene die veur ós de vastelaoveswaeg höbbe aangelagdj, kinne genéte vanne Linner jeug die det vastelaovespaad gaon bewanjele.

Ten 7dje: det ich haop det gans vastelaovesminnendj Lin mit mich de vastelaovendj geit viere en det vr ós op väöl plekke gaon taegekómme.

Ten 8ste: det ich de gedachte achter enne geis vanne vastelaovendj verdedig, wie ich det doon inne gaol bie de Linner veterane.

Ten 9dje: det ich haop det de vastelaovendj in Lin zal klinke wie ’n klok, marchere wie ’n sjöt, sjittere wie ’t zunke, det ’t ederein hie veur de windj zal gaon en vastelaovendj geit viere in goje harmonie mit elkaar.

Ten 10dje: det ’t sjiek zów zeen es alle vastelaoves-activiteite drök waere bezóch en det ich daobie veural haop det de kinderactiviteite vólle zale zulle trekke!

Ten 11dje: det de Linner vastelaovendj zal waere bezónge en vol zal zeen mit bonte kluuëre, sjoeane pekskes en prachtige Linner leedjes veur noe en de kómmendje jaore.

En dit alles ónger miene sjpreuk:

 

VASTELAOVENDJ, DÁO ZITJ MEZIÉK IN!