NUUTS

Bekiek os aangepasjte programma veur 2021!

Lamgesjlage woore v'r ein aantal maondje geleeje. Van ós gebroekelike pregram kint door de aanhaojende coronamaotregele helemaol nieks gerealiseerd waere. "Op dees maneer is d'r nieks aan" en "De kins tóch nieks organisere mit dees maatregele". Det zeen de gedachte die door óze kop sjoote. Aevel zeen v'r nét oppe tied wakker gewaore oet dees COVID-nachmerrie en höbbe v'r ós mit de vereniging biejein geraap om d'r tóch get van te make. 

De vastelaovendj in Lin geit door áuch in 2021. Juus in 2021. Vastelaovendj mot dit jaor meer den ooit veur verbinjing zörge. Daorom zeen v'r gruuëts om ós Coronaprogramma aan te kinne kondige, woomit jongk en aod tóch nog ein bietje vastelaovesmagie kint mitpikke. Aafgeloupe zaoterdig (9 jannewari) höbbe v'r al de Vastelaovesgezèt van 2021 gratis hoes-aan-hoes bezorg en 't dörp versierd mit ballonne en vlègskes.

De kómmendje waeke kint g'r 't volgendje van ós verwachte:

ZAOTERDIG 16 JANNEWARI: Leedjesaovendj Bingo i.s.m Lin FM (19:44)

't Vastelaovesseizoen 2020-2021 zów eigenlijk in 't teike sjtaon van de 44e Linner Leedjesaovendj. Ondanks det dizze sjoeëne aovendj vanwaege Keroona geine doorgank kint vinje, wille v'r dit jubileum natuurlik neet zomaar veurbiej laote gaon. Daorom organisere v'r op 16 jannewari de enige echte Leedjesaovendj Bingo! Dit belaofd unne supersjoone muzikale aovendj te weare mit bekindje en minder bekindje leedjesaovendj winnaars/deilnömmers.

Wie duisse deze aovendj unne gooi nao die sjoone prieze?
1) Download dien gratis bingokaart via www.linfm.nl 
2) Loester op Zoaterdig 16 Jannewari vanaaf 19.44 nao LIN FM, via www.linfm.nl en sjtreep de nummerkes die se heurs aaf!
3) Dinkse unne correcte BINGO te höbbe? Bel den nao de sjtudio en claim dae pries!

Deilname is gratis, de sjtream is inne loch vanaaf 19.44, de BINGO sjtart om 20.11. 
Meer info via Feesboek.

ZAOTERDIG 30 JANNEWARI: Vastelaovesquiz i.s.m Lin FM (19:44)

Dinks dig alles te weite euver ooze sjoone Vastelaovendj en alles waat daomit samehingtj? Sjrief dig den sjnel in veur de Vastelaovesquiz op zaoterdig 30 jannewari en maak kans op geweldige prieze! Sjtof dien vastaoveskinnes aaf, klink ins mit diene buurman (dae is vas aardiger dense dinks) en quiz mit!

De sjtream sjtart om 19.44 en de quiz begintj om 20.11, opgave is meugelik via www.linfm.nl en de deilname is gratis. Esse dich veur de sjtart van de quiz via de website aanmeldjs, den ontvingse per mail nog ein bonusronde. 't Is daonaeve meugelik om ein lekker drankpakketje te besjtèlle veur €15,- per sjtuk. Daomit bezörg g'r uchzelf eine lekkere aovendj en sjteunt g'r auch eine lokale ongernömmer. Dees pakkette zeen binnekort te besjtèlle via de website van de Kwekkerte.

Meer info is auch te vinje via Feesboek.

VANAAF MAONDIG 8 FIBBERWARI: Vastelaovessjpeurtoch


Noe v'r neet same mooge komme, trèkke v'r d'r mèr allein op oet door de Kwekkertepool. V'r höbbe ein sjoeën route veur uch samegesjtèld door os sjoone dörpke. Veur jonk & aod, opgeleuktj mit versjillende sjpelkes, puzzelkes en vroage. Det brik zoeë lekker de quarantaine!

De Vastelaovessjpeurtoch is vanaaf maondig 8 fibberwari besjikbaar, toet in de eeuwe der eeuwe. Deilname is gratis en besjikbaar via de app Troovie. Meer informatie en instructies veur deilname volge t.z.t. via de Kwekkerte-Facebookpagina en de website, www.kwekkerte.nl

MAONDIG 8 FIBBERWARI: Aod Wieverbal in un digitaal jeske (20:11)


Op 't Aod Wieverbal geit van aodsher eederein onherkinbaar de sjtraot op. Om 12 oer gaon de maskers aaf en den dink se "Verrek, bös doe det?!". Hoewel... Waat noe es eine infiltrant mit kwaoje bedoeling zich zów mènge onger de meinigte? 

Tiedens dit Digitale Aod Wieverbal gaon v'r op zeuk nao de (virtuele) moordeneers in ós midde. Lukt 't de onsjuldige feesvierders om de infiltrante te ontmaskere veur det ze om zich haer griepe? Meer info euver opgave volgt via de website en Facebook!

ZONJIG 14 FIBBERWARI: Groeëte Digitale Linner Optoch (14:11)


't Is al väöl te lang geleeje det Lin eine optoch hej! Daorom zórge v'r d'r geweun veur det d'r in 2021 wie den auch eine kump, al is 't online. Eederein dae wiltj kint zich in de kommendje waeke oetlaeve aan ein minituur-ker, duo of ein klein einzelgengerke. Auch Lego/Duplo kintj natuurlijk gebroek weare om bijveurbeeldj dien creatie te vormen. De meis indrukwekkende, ludieke deilnames make kans op ein leuk prieske.

Kinjer kriege informatie via de sjool. Volwassene die mit wille doon kinne zich opgeave via www.kwekkerte.nl vanaaf 14 Jannewari. Men kintj ein plenkske aanvroage biej de Kwekkerte, wao-op se diene eige wage kins make. Zelf moogse natuurlijk oug eine ongergrondj keeze, woobiej ein A4tje de maximale aafmeating. Lever uuterlijk Maondig 8 Fibberwari dien creatie in. Meer info euver deilname en inlevering volgtj oug weer op os facebookkanaal en oppe website.

DINSDIG 16 FIBBERWARI: Online Poetebal & Kwekkertverbranje

Online Poetebal (14:11):
Auch 't Poetebal wit ziene waeg te vinje nao de digitale waereldj. Zie kinne häör optreajes thoes opnömme en doorsjture nao de organisatie, zodet veer dees kinne verwirke en montere in ein digitale show. Meer info en belangrieke data volgtj sjnel via deze website en Facebook.

Online Kwekkertverbranje (19:33):
Auch óze traditionele aafsjloeting vanne Vastelaovendj zölle veer dit joar neet verlaore laote gaon. De kwekkert wördj wie den auch oug verbrandj dit jaor. De ceremonie is live te volge op Facebook vanaaf 19:33.

Doot mit!

Programma Kwekkerte 2021

Mit dit programma haope v'r in dees tieje get leech inne duusternis te bringe. Haoj ós social media kanale en de website good inne gate veur meer informatie euver alle evenementen en deilname. Veer hoape d'r same mit alle luuj die de vastelaovendj un werm hert toe drage, ein succes van te make, en zo toch de vastelaovendj te viere. Blief gezondj én...
 
Vastelaovendj Same!