NUUTS

7 raejene om dich vandaag nag op te gaeve veur de Leedjesaovendj

Op zaoterdig 30 november 2019 vinjt wederom de Linner Leedjesaovendj plaats. Al inkele vastelaovesveterane höbbe zich aangemeldj, mer oug doe kins dich nag sjteeds insjrieve mit dien eige vastelaovesleedje. Dit zeen 7 raejene woorom desse geine sjpiet kries van dien deilname aan de Leedjesaovendj:

1. 
De sjtuis d'r neet allein veur
Veroet de meiste deilnaemers aan de Leedjesaovendj gaeve zich op es groep. Zigk noe eerlik, waat is d'r noe leuker den same ein leedje bedinke, opnömme en aan 't Linner publiek prizzentere. Dus; trommel dien vrunj op en gank van sjtart. 

2. De kins dien creativiteit de vrieje loup laote
Ein vastelaovesleedje kan euver vanalles gaon. Fees, beer, vrouwluuj, de bridgeclub... Pak dien favoriete Limburge sjpraekwaord en gooi teks veur dien leedje is döks al sjnel gebaore.

3. Ein leedje make hoof neet duur te zeen
Natuurlijk, esse dien leedje wils laote opnömme mit professionele apparatuur, den kos det ein paar cente. Gelukkig haet de CV ein biejdrage opziej gezat veur elke deilnömmer. Maakse eine cover? Den ontvingse €50 ter compensatie. Veur originele nummers is de biejdrage €75. Daomit is vaak ein groot deil van de koste gedèk. 

4. Ein leedje make hoof neet moeilik te zeen
V'r verwachte neet det eederein sjtiekem eine Mozart of Beethoven in zich draag. Ein eige compositie make vereist 't neudige talent en de neudige tiedsinvestering. Gelökkig is 't make van eine cover betrekkelik eenvoudig. Van väöl populaire nummers is d'r immers ein instrumentale of karaoke versie besjikbaar op 't internet, beveurbeeld op Spotify, Youtube of www.karaokeversie.nl. 't Enige waat dich dan nag rès is 't sjrieve van ein passende tèks.   

5. De Leedjesaovendj is sjpannend
't Volk bepaolt de winnaar. Det maak de Leedjesaovendj verfrissend wispelturig en verrassend onveursjpelbaar. Toch sjtuit d'r ein dingk vas: de meiste leedjes zeen aan elkaar gewaag. 

6. D'r vilt get te winne
Los van de eeuwige en onvergankelijke roem, 't applaus en de felbegeerde Chrit Breukers Award (veur 't beste originele nummer), verdeent elke winnaar eine hervel bonne. Det is toch fijn eine aovendj veur nieks buizele. 

7. Ein vastelaovesleedje is veur de eeuwigheid
Roze verwelke, sjeepe vergaon, mer ein vastelaovesleedje blief altied besjtaon. Door dien deilname sjinkse ein nuuj pareltje aan de Linner vastelaovendj, detse gegarandeerd de kommende jaore regelmaotig veurbiej zóls heure komme tiedens 't carnavalsseizoen.

Genog geheurd? Meld dich den metein aan! Waal enthousiast mer gein idee woosse mos beginne? Nöm den contact op mit CV de Kwekkerte via secretaris@kwekkerte.nl en v'r probere dich zo sjnel meugelik te helpe.