In eine bomvolle ‘Hansenzaal’ in os nuuje gemeinsjapshoes: D’n Dynamiek, is Patrick I Rademakers oetgeroope tot 72e Kwekkerteprins. Nao ein zinderende klopjach van ut welbekindje ‘Jachtseizoen’, kwoom neemes minder es Patrick I es nuuje veurgenger van CV De Kwekkerte teveursjien.
Patrick I, zal dit sezoen biejgesjtaon waere door ziene zoon Secondant Sjoerd, Adjudant Harrie, Adjudant Rob, Adjudant Kim en last but not least Hofdame Susanne
Prins Patrick I, zal regere onger ziene sjpreuk: ‘Van Meister toet Kwekkerteprins, Blief druime, d’r is nieks waat se neet kins!’
Schlager van Prins Patrick I - Gas d'r op!
Proclamatie Prins Patrick I
Ich, Patrick Andreas Johannes Gerardus Rademakers, zoon van Ida Wilhelmina Gerarda (Ine) Teeuwen van oppe Ruiver en Henricus Johannes (Henk) Rademakers, oet ’t Räötje, gebaore as Moosköpke in ’t Räötje, laot uch weite en verklaor hiejbiej:
Ten 1ste:
Det ich miene legendarische veurgenger Jeroen I, same mit zien 4 adjudanten en de ganse raod, wil bedanke veur ’t fantastische sezoen det v’r aafgelaupe jaor gehadj höbbe. Waat höbtj geer veurig jaor gefieësj, in neet minder dan 111 activiteiten. Ein absoluut record!! Dich höbs de lat extreem hoog neergelach. Ich zal probere dich waardig op te volge op mien meneer. Bedanktj veur ’t sjooëne sezoen!
Ten 2dje:
Det ich ontzettendj bliej bön det miene druim, om “grote” Prins te waere, in vervulling geit. En det precies 35 jaor, naodet ich bie de Berggeitjes in Berg jeugdprins woor en 23 jaor naodet miene Pap Prins van de Waldeslustgengers is gewaesj.
Ich wil uch dit jaor allemaol van herte oetneudige om deze druim same mit mich en mien gevolg te belaeve. Alle miense en veuràl alle kinjer van ut dörp!
Ten 3dje:
Det ich ontzettendj trots bön op mien vrouw Susanne, ein ech Linner maedje, en miene zoon Sjoerd, die mich dees kans gaeve en die mich als “Hofdaame” en belangriekste “secondant” bie zölle sjtaon, in dit fantastisch sezoen!
Ten 4dje:
Det ich trots bun op mien adjudanten, die same mit os ten Vastelaoves-sjtrijde wille trékke. Ich vinj ut ein ieër om dit mit uch te gaon doon. Same gaeve veer gaas!!!!
Ten 5dje:
Det ich de ieërste basissjool-Prins van De Kwekkerte bön, naodet v’r zelf al väöl Kuulköpkes, Kwaakers en Kwekkerte höbbe aafgeleverdj de aafgelaupe jaore.
Ten 6dje:
Det de basissjool dit sezoen ut Epi-centrum is van de Linner Vastelaovendj. Mit de Prins en ut kosbaarste bezit van de Vastelaovendj, de jeugd, aan de mach!!
Ten 7dje:
Det v’r same bie Marja, ozze tempel ‘Kefee De Tramhalte’, gaas gaon gaeve.
Van 11 oer ’s mörges, toet minimaal 11 oer s’aoves, same mit zoväöl meugelijk miense in Lin.
Ten 8ste:
Det veer ut ieërste Prinsegezelsjap zeen det in ut nuuje Gemeinsjapshoes D’n Dynamiek de Vastelaovendj geit viere. Veer zölle veur ein fantastisch, dynamisch fieësje gaon zörge! Haopelik sjteit de zaak nog rechop nao die daag….
Ten 9dje:
Det ich ut zeker neet erg vinj om nao jaore weer same mit de jeugd te gaon “hakkuh….” op Vastelaovesmeziek, mer det de Polonaise altied volksdans nummer 1 zal blieve!
Ten 10dje:
Det v’r alle Kuulköp, Kwaakers, Sjtoepkloekers, Kwekkerte en alle angere Vastelaovesvierders oproope om same mit os de Vastelaovendj te viere hiej in os geweldige dörp en wille vraoge massaal mit te trékke in de Groeëte Linner Optoch!
Ten 11dje:
En toet sjlot nog ein wieze les van de Meister: Blief veur altied jonk en geneet van ut moment!!
En vergaet neet: Doe bus vandaag wiezer dan det se ooit woors en jonger dan det se ooit nog zals waere…..
Dit alles gaon v’r doon onger miene sjpreuk: “VAN MEISTER TOET KWEKKERTEPRINS,
BLIEF DRUIME, D’R IS NIEKS WAAT SE NEET KINS!”
