Óm nao ’t óntsjtaon vanne vereniging te gaon, mótte v'r trök nao juni 1951.

De besjture van Sjötterie “St. Martinus” en Sjportvereniging “Linne” kome same óm 'n Vastelaovesviering in Lin op pote te zètte. D'r waerdje besjlaote óm alle besjture van de vereniginge en pötte op te rope óm te kieke of d'r genóg animo zów zeen.

Op 23 juli 1951 wore bienao alle besjture vanne oetgenuuëdigdje vereniginge en pötte biejein in Café Sjlabbers.
't Enthousiasme woor dusdanig groeat det d'r 'n commissie opgerichtj waerdje.

Op 7 en 14 augustus wore d'r twieë biejeinkómste bie Nic v.d. Loo oppe Groeatesjtraot.

In lokaal Th. Sjmeets oppe Mert koom m'n toet 'n Dageliks Besjtuur vanne commissie:
Veurzitter: J. Hulsbosch
Penningmeister: K. Slabbers
Secretaris: L. Frencken

Op 20 augustus 1951 hej 't Dageliks Besjtuur 'n afsjpraok mit de Burgemeister óm 't ein en anger te regele.
De Burgemeister sjtumdje toe mit 'n drietal balaovendje ónger de volgendje veurwaarde

- alles mós netjes verloupe,
- d'r móch gein Bal-Masquée waere gehaoje,
- gein hofdames,
det de commissie de tuikes sjtrak inne henj mós haoje,
mit name veur waat betruftj de wages inne optoch en de kleierdrach.

17 september 1951 is den bie Café Evers de samesjtelling vanne Raod van Elf. Alle aafgevaardigdje móchte kandidate nao veure bringe. Ouch waerdje d'r gesjtumdj euver de naam vanne vastelaovesvereniging.
Mit 13 sjtumme waerdje de naam DE KWEKKERTE aangenaome.

In Cafe J. Verheyden aan de Parallelwaeg volgdje op 2 oktoeaber de sjtumming euver de Raod van Èlf.
Nao diverse sjtumrunj kome de volgendje name oet de bös:
H. Zorge
J. Willems
K. Slabbers
R. Houwen
H. Vossen
J. Mans
W. v.Daal
M. Creemers
G. Evers
A. Creemers
H. Schuren
J. Schuren

Op 19 oktoeaber wurtj 'n aparte vergadering gehaoje in Café Hansen.
De Raod van Èlf geit de Vors keze: nao 3 sjtumrunj koom Jos Mans es Vors oet de bös.

Nao ’t bedanke van J. Willems op 17 oktoeaber waertj B. v.Vlodrop toegevoegdj ane Raod.
Ouch waerdje d'r gesjtumdj euver de ieëste Tempel. Det waerdje Café Verheyden.

De ieëste officiële daag van De Kwekkerte is op zónjig 21 oktoeaber 1951.
Ónger ‘t ieëste bal waertj de Raod van Èlf en Vors Jos Mans veurgesjtèldj aan ’t dörp.  
Óm tieën oer numtj de vereniging officieel entree inne nuje tempel.
Ouch de nuje Tempelhaojer hètj de Raod welkóm in ’t KWEKKERTE-NÈS.
De nuje Vors duit drek van zich sjpraeke mit de oetsjpraok det 'ne Kwekkert zich lever in 'ne Pool ophèltj en de Tempel de naam KWEKKERTE-POOL mitguftj.

Op 11 november 1951 kumtj de Raod biejein in de Kwekkerte-pool om de ieëste Prins vanne Kwekkerte te keze. Es kandidate gaeve zich op:
W. v.Daal
J. Mans
H. Vossen
H. Schuren
B. v. Vlodrop
R. Houwen

26 november 1951 wurtj Wiel v. Daal veurgesjtèldj es Ieëste Prins van Vastelaovesvereniging de Kwekkerte aan ’t comité    

Wisj g'r det:
- Destieds in Lin 14 cafés gevestigdj wore!!
- ’t Ieëste vastelaovesleedje van Lin op 21 oktoeaber 1951 gezónge waerdje door de here Jeurissen en Schuren.       
- Dit beloeandj waerdje mit 'ne pries van 11 gölje 11.
- Prins Wiel I de zónjig veur de Vastelaovendj veurgesteldj waerdje aan ’t Linner dörp (17 februari 1952).
- De ieëste kostuums en prinsepak 'n invesjtering woor van 250 gölje.
- In de optoch van 1952 mer leefs 13 wages mitreje!!
- Vastelaovesdinsdig óm 23.45 de ieëste Kwekkert waerdje verbrandj bie de kios.
- De twieëdje prins vanne Kwekkerte op 11-11 1952 waerdje gekaoze.
- En op 18 januari 1953 veurgesjtèldj waerdje es Sjra I.
- Op 2 mieërt 1953 de Burgemeister alles aaflasdje vanwege de watersnoeadsramp.
- Op 18 januari 1954 Sjra I opnuuj gekaoze waerdje es Prins.
- In 1954 't ieëste aod wieverbal waerdje georganiseerdj.